425,70 504.60 5.77
+7 (7172) 757 485 24kz@khabar.kz
ҚАЗ

Британ парламентінің лордтар палатасында Абай мұрасы талқыланды

  • 220
  • UPD: 18:51, 28.11.2020

Онлайн-кездесуге қатысушылар ұлы ақынның шығармалары Батыс пен Шығыс мәдениеттері арасында рухани көпір болғанын әрі әлі күнге дейін өзекті екендігін атап өтті.

Іс-шараға Британ парламенті Қауымдар палатасының депутаттары, Ұлыбританияның Цифрландыру, мәдениет, бұқаралық ақпарат құралдары және спорт мәселелері бойынша мемлекеттік министрі Джон Уиттингдейл қатысты. Еліміздің атынан Мәдениет және спорт министрі Ақтоты Райымқұлова және Қазақстанның Ұлыбританиядағы елшісі Ерлан Ыдырысов сөз сөйледі. Лордтар палатасының мүшесі және «Консервативтік партиядағы Еуразия достары» ұйымының Президенті Питер Лилли Абай да Шекспир сияқты өз заманының қайталанбас тұлғасы болғанын атап өтті.

Питер Лилли, Британ лордтар палатасының мүшесі:

– Абай еңбектерімен танысып, ерекше әсер алдым. Оның қазақшадан тікелей ағылшыншаға аударылған шығармалар жинағы қатты ұнады. Тәржімашыларды бұл жетістігімен құттықтаймын. «Өлді деуге бола ма айтыңдаршы, өлмейтұғын артында із қалдырған» деген өлең жолдары бар шығармаға тәнті болдым. Бұл сөздер Абайдың өзіне де арналған сияқты.

Ақтоты Райымқұлова, ҚР мәдениет және спорт министрі:

– Ұлы ақынның 175-жылдық мерейтойының халықаралық масштабта өткізудегі ең маңызды міндеттердің бірі – Абай шығармашылығын әлем халқына насихаттау. Осыған орай мерейтой қарсаңында Абайдың өлеңдері мен қарасөздері 10 шет тілдеріне, соның ішінде француз, ағылшын, араб, испан, қытай, жапон, неміс, италия, түрік, орыс тілдеріне аударылып, аударылған елдер тілінде тарату жоспарланып отыр.

Кездесу тек мәдени ғана емес, екі ел арасындағы коммерциялық байланыстарды нығайту тақырыбын да қамтыды. Ұлыбританияның бизнес, энергетика және өнеркәсіп стратегиясы мәселелері бойынша мемлекеттік министрі Пол Скалли Қазақстанның Біріккен Корольдік үшін сауда-инвестициялық салалар бойынша маңызды сауда әріптесі болып қала беретінін атап өтті.

Хабар 24 телеарнасы