378,17 430.15 5.89
+7 (7172) 757 485 24kz@khabar.kz
ҚАЗ

Павлодарда коммуналдық апаттың себебі анықталып жатыр

  • 216
  • UPD: 21:29, 01.03.2019

Павлодар қаласында ірі коммуналдық апат болып, тұрғындарды біраз әбігерге салды. Салдарынан 30-дан астам көп қабатты үй су беру желілерінен ажыратылды. Жауапты мамандар су тасу жұмыстарын қолға алған. Оқиға орнындағы шараларға 30-дан астам техника құралы мен бірнеше бригада жұмылдырылды. 

Балалар теміржолы ауданындағы коммуналдық апат таңғы уақытта болған. Сол сәттен бері жылу және су тарату мекемелерінің өкілдері осы жерде.

Ақмарал Есімханова, тілші:

- Жауапты мекеме қызметкерлері апат ошағын анықтау мақсатында тиісті шараларды қолға алды. Нақтырақ айтқанда, жүйелердің аумағындағы төрт бірдей учаскеде зерттеу жұмыстарын жүргізуде. Мамандардың болжауынша, 30-дан астам көп қабатты үйді сусыз қалдырған коммуналдық апаттың екі себебі бар. Біріншісі, су тарату желілеріндегі ақау болса, екіншісі - жерасты суларының көтерілуі.

Апаттың зардабын жүзеден тұрғын көріп жатыр. Әсіресе, зейнет жасына келген азаматтарға шелектеп су тасу қиын. Бұл апат қала жұртын алаңдатқан байырғы мәселенің бетін ашты. Соңғы бірнеше жылда аумақта су көтеріле берген. Бірақ қиындық туғызбаған. Мамандар судың қайдан келетінін анықтай алмай отыр.

Нұрлан Рашитов, қалалық тұрғын үй инспекциясының сектор меңгерушісі:

- Судың осындай деңгейде көтерілуі бұрын-соңды болмаған. Салдарынан осы маңдағы ондаған үйдің жертөлесіне су кірді. Өзге мекемелерде де сондай жағдай. Су сору жұмыстары тәулік бойы жүргізіледі.

Мол судың салдарынан Павлодар бизнес колледжі ғимаратының іргесі сөгіле бастаған. Бірнеше аудитория апатты деп танылып, сыз басты. Бүгін 400-ден астам студент үшін сабақ тоқтатылды. Бұл мәселе 10 жыл бойы әкімшіліктің бас ауруына айналған. Мамандардың айтуынша, апаттың болуына кезінде иесіз қалған ескі жүйе түрткі болуы мүмкін.

Сергей Панихин, жылу желілері кәсіпорнының бас инженері:

- Ақау жылу желілерінде анықталса, нормативті құжаттарға сәйкес 12 сағаттың ішінде жөнделеді. Бұл жерлерде кезінде иесіз қалған желілер жатыр. Апатқа сол да себеп болуі мүмкін.

Әзірге апаттың нақты себебін айту қиын. Қазіргі уақытта көпқабатты үйлерге су беріле бастады. Тұрғындарды жылу желілерінен ажырату жоспарланбаған. 

Авторлары: Ақмарал Есімханова, Марат Игіліков

Хабар 24 телеарнасы