389,71 430,40 6.06
+7 (7172) 757 485 24kz@khabar.kz
ҚАЗ


Жеке деректері қолды болған «Болашақ» стипендиаты АҚШ-қа виза ала алмай жүр

  • 153
  • UPD: 15:11, 04.10.2019
Жеке деректері қолды болған «Болашақ» стипендиаты АҚШ-қа виза ала алмай жүр

«Болашақ» стипендиясының иегері алматылық Айдос Бердібаев жеке деректерінің қолды болуынан АҚШ-қа виза ала алмай жүр.

Бүгін ол ҚР Сыртқы істер министрінен көмек сұрады, деп хабарлайды ҚазАқпарат.

«Болашақ» бағдарламасымен Америкада оқуым керек еді. Тілдік курстарды аяқтаған соң, студенттік визаны жаңартып, АҚШ-та академиялық білім алу үшін Қазақстанға оралдым. Бірақ, Алматыдағы АҚШ Консулдығы маған виза беруден бас тартты, себебі Абзал Мұқашев есімді қазақстандық менің анкеталық деректерімді пайдаланып, жалған құжаттармен айналысқан. Ол менің аты-жөнімді көрсеткен. Сондықтан, 212 А бабымен (Шетелдіктер контрабандасы) маған және әйеліме визаға тыйым салынды», – деді А. Бердібаев «Nur Otan» партиясындағы қоғамдық қабылдауда. Осыдан кейін А. Бердібаев ІІМ және прокуратураға бірнеше рет хабарласқан.

«Қылмыс табылмады деген желеумен іс жабылып қала берді. Консулдықпен бірнеше рет келіссөздер жүргізген соң, америкалық тарап маған ақталуға, жағдайды түсіндіруге соңғы мүмкіндік беріп отыр. Мен үшін бұл визаны алу маңызды. Себебі, виза берілмесе 10 млн теңге қарыз мойныма жүктеледі немесе әкемнің үйін алып қояды», – деді алматылық тұрғын.

Өз кезегінде Мұхтар Тілеуберді АҚШ Бас консулдығымен тағы бір рет кездесу қажеттігін айтты.

«Иә, заң бойынша «Болашақ» талаптарының қатал екенін білеміз. Консулдық қызмет департаментінің қызметкері дүйсенбі күні Алматыда болады және сізбен кездеседі. Сосын АҚШ Бас консулдығына барып, келіссөздер жүргізесіздер. Оларға не қажет екенін тағы анықтау керек. Егер «Болашақ» бағдарламасының стипендиаты екеніңізді ресми растау керек болса, құжаттарды әзірлеген жөн. Сонда біз ҚР СІМ ресми нотасымен сізге виза беру туралы сауал жолдаймыз. Біздің өкіліміз сізбен кездесу үшін Алматыға арнайы барады», – деп жауап берді министр.

Хабар 24 телеарнасы