439,01 487,00 5.70
+7 (7172) 757 485 24kz@khabar.kz
ҚАЗ


Иран полициясы аймақтағы әріптестеріне есірткі трафигі туралы дабыл қақты

  • 87
  • UPD: 16:49, 26.02.2020

Соңғы бір жылда Иранда бір мың тонна есірткі тәркіленді. Басым бөлігі Ауғанстан және Пәкістанмен іргелес елдің оңтүстік-шығыс аумағынан табылды. Иран полициясы есірткі тарататын қылмыстық синдикаттарға жалғыз өзі төтеп беруі жылдан жылға қиындап баратынын алға тартып, дабыл қағып отыр.

Иран Түркияға, ал одан кейін Еуропаға есірткі жеткізудің ең қысқа жолы ретінде бұрыннан қолданылып келеді. Соңғы 10 айда полиция 800 тонна есірткі тәркіледі. Бұл өткен жылғы мөлшермен салыстырғанда 17 пайызға артық.  Иран үкіметі шекараларын бекітуге жүздеген миллион доллар жұмсап келеді. 

Марьям Шокрани, экономист:

- Бүгінде әлемдік деңгейде әрекет ететін есірткі синдикатына төтеп беру қиындап кетті. Санкциялар кедергі келтіріп жүр, Еуропа бұл күресті Иранмен бірлесіп жүргізуі керек. БҰҰ Иран мен көрші елдерді тартып, есірткімен күрес бойынша конференциялар ұйымдастырып келеді. Санкцияларға байланысты өзге елдер Иранмен бұл істе тиісті деңгейде ынтымақтаспайды. 

Өткен жылы Иранның күштік құрылымдары есірткіге қарсы екі мыңнан аса операция өткізген болатын. Бүгінде 2 мың шақырымға жалғасқан мемлекеттік шекара барлық қажетті құралдармен жабдықталған. Алайда екі жылдан кейін оны қайтадан жаңғырту қажет. Өйткені қылмыс әлемінің өкілдерінен айла артылмайды, олар да есірткі жеткізудің жаңа әдістерін ойлап табады. 

Мехран Наваи, саяси талдаушы:

- БҰҰ әлемдегі нашаның 75 пайызы, морфиндердің 61 пайызы және героинның 71 пайызы Иран шекарасы арқылы өтетінін хабарлады. Иран және оған көрші елдердің есірткімен күреске шығындарын өтеу туралы БҰҰ-мен келісімі бар. Бірақ ұйым оны орындамай отыр, сондықтан Иран қолдан келгенше шекараны өз күшімен қорғап келеді. 

Әзірге есірткі тасымалы мәселесін шешуге тек Қытай ғана ниет білдірген. Наурыз айында қос тарап өкілдері кездесіп, Тегеранға бұл тұста қандай көмек  керектігін жан-жақты талқыламақ. Бейжіңнің шешіміне жақында Қытайда болған оқиға түрткі болды. Дәлірек айтқанда жергілікті мектептерде героин сатылмақ болыпты. Полиция бұл есірткі Ауғанстаннан жеткізілгенін анықтады.

Авторлары: Юлия Гнатюк, Махмуд Махмуди

Хабар 24 телеарнасы