426,19 497,47 5.54
+7 (7172) 757 485 24kz@khabar.kz
ҚАЗ


Эпилепсиямен ауыратын науқастар сапалы дәріге мұқтаж

  • 91
  • UPD: 22:25, 14.09.2020

Еркеш Бектұр қазір 6 жаста. Туа сала дәрігерлер балаға эпилепсия диагнозын қойған, деп хабарлайды «Хабар 24».

Содан бері бүлдіршін талма ауруымен арпалысып келеді. Анасы Әйгерім Абдрахманованың айтуынша, баласын емдеуде елімізде тіркелген дәрілер еш нәтиже бермепті. Тек шетелден әкелінген дәрінің арқасында күніне 5-6 рет қайталанатын ұстамасы 1 ретке дейін азайған.

Әйгерім Абдрахманова, науқастың анасы:

– Қазақстанда тіркелген дәрілердің 6 тобы бар. Ол 6 тобын да біз қолданып көрдік. Бірақ ешқандай әсер етпеді. 6 айынан бастап дәрігермен ақылдаса отырып Қазақстанда тіркелмеген дәрілерді қолдана бастадық. Тапсырыс беріп алдырамыз. Бағасы арзан деп айта алмаймын. Бір айға жететін бір дәріге 40 мың тг кетеді.

Карантин уақытында әуе жолы да, теміржол қатынасы да тоқтаған кезде ата-аналар балалары үшін жандарын шүберекке түйгендей күй кешкен. Сәуір айында дәрілерді елге бір реттік алдыру ақысын төлеп беретін демеуші табылыпты. Денсаулық сақау министрілігінің өкілдері көмектесетіндерін айтып, уәде де берген. Тіпті ресми хатта дәрілердің елге жеткізілгені жайлы айтқан.

Мәдина Бейсембаева, қоғамдық қордың жетекшісі:

– 28 тамызда ресми жауап алдық. Онда қажетті препараттардың Қазақстанға әкелінгені туралы жазылған. Оны кім әкелгені, қалай әкелгені, кімге берілгені белгісіз. Тізімде көрсетілген науқас балалардың ешқайсысы бұл дәрілерді алған жоқ.

Осы мәселеге байланысты Денсаулық сақтау министрілігіне хабарласқан болатынбыз. Ондағылар дәріні елімізде тіркеу өте ұзақ уақыт алады дегенді алға тартты. Бірақ қаулыға сәйкес Қазақстанда тіркелмеген аса қажет дәрілерді елге бір рет әкелуге болады.

Александр Костюк, ҚР ДСМ Дәрімен қамтамасыз ету және стандарттау департаментінің директоры:

– Құжаттардың дұрыс дайындалмауына байланысты Тауарлар мен көрсетілетін қызмет сапасын бақылау комитеті дәрілерді бір рет алдыруға рұқсат бермеген. Сондықтан препараттар елге әкелінбеді. Қазіргі уақытта аталған комитетке мәселеге тағы бір назар аударуын сұрап, өтініш жібердік. Егер құжаттар дұрыс жасалса, препараттарды елге әкелуге ешқандай қиындық болмауы тиіс.

Эпилептолог дәрігер Сергей Савинов алдына келген науқастарға көп жағдайда елімізде жоқ дәрілерді тағайындайды. Оның айтуынша, құстың сүтіндей болған препаратты Қазақстанда тіркеу үшін оны қолданатындардың саны көп болуы тиіс. Себебі фармкомпаниялар аз көлеммен жұмыс істегісі келмейді. Оған салынған салық дәрінің бағасын аспандатып жібереді.

Сергей Савинов, эпилептолог дәрігер:

– Осы дәрілерді әкелетін фармацевтикалық компанияларға баж салығын төмендету керек. Еуразиялық экономикалық одақ арқылы препараттарды жеткізу жағын қарастырса екен. Яғни кеденнен кедергісіз өткізілсе керемет болар еді.

Дәрігерлер: «Мәселені тағы бір жолмен шешуге болады», – дейді. Егер эпилептикалық энцефалопатия тобын орфандық аурулар, яғни сирек кездесетін дерттер қатарына қосса, қажетті дәрілерді Қазақстанда тезірек тіркеуге мүмкіндік болар еді.

Авторлары: Гүлжан Көленқызы, Анастасия Вылегжанина, Нұрдәулет Жақсыбаев

Хабар 24 телеарнасы