422.87 509.00 5.60
+7 (7172) 757 485 24kz@khabar.kz
ҚАЗ

Түркістан облысында браконьерлерден 150 келіден астам балық тәркіленді

  • 151
  • UPD: 15:33, 21.10.2020
Түркістан облысында браконьерлерден 150 келіден астам балық тәркіленді polisia.kz

Түркістан облысының полицейлері браконьерлерден 150 кг-нан астам балықты тәркіледі, деп хабарлайды Polisia.kz.

Естеріңізге сала кетейік, 12 қазан мен 11 қараша аралығында Түркістан облысының аумағында «Браконьер» жедел алдын алу іс-шарасының өткізіліп жатқаны айтылған болатын.

«Браконьер» жедел алдын алу шарасының сегіз күнінде Түркістан облысы ПД ЖПҚ табиғатты қорғау полициясының қызметкерлері табиғатты қорғау заңнамасы саласында үш экологиялық қылмыс пен 159 әкімшілік құқық бұзушылықты анықтады. Браконьерлерден барлығы 12 дана тіркелмеген қару, 152 келі заңсыз ауланған балық, екі қырғауыл, үш қайық пен 200 метрден астам балық аулауға арналған торлар тәркіленді.

Мәселен, рейдтік іс-шаралар барысында табиғатты қорғау полициясының қызметкерлері Келес АПБ учаскелік инспекторларымен бірге Сырдария өзенінің жанындағы электрлі аудың көмегімен балық аулаумен айналысқан жергілікті тұрғынды ұстады. Күдіктіден электрлі тор, қайық пен балықтарды тәркіледі. Тәртіп сақшылары ер адамды балық аулаған заңсыз құралдарымен бірге аудандық полиция бөліміне жеткізді.

Екі тәулік өткен соң Шардара аудандық полиция бөлімінің полицейлері Шардара су қоймасының жағасында «Қытай торының» көмегімен заңсыз балық аулап жүрген тағы екі браконьерді ұстады. Олар Жетісай ауданының тұрғындары.

Ұсталған азаматтардан тәртіп сақшылары заттай айғақ ретінде қайықты, 100 метр балық аулау торы мен 126 келі балықты тәркіледі.

Қазіргі уақытта аталған жайттарға қатысты ҚР ҚК 335-бабы (Балық ресурстарын, басқа да су жануарларын немесе өсімдіктерін заңсыз өндіру) бойынша сотқа дейінгі тергеу жүргізілуде. Полицейлер оқиғаның мән-жайын анықтауда.

Сонымен қатар, тәртіп сақшылары табиғат қорғау заңнамасын бұзудың 159 жайтын анықтады. Оның ішінде 27-сі жануарлар дүниесін пайдалану талаптарын бұзу, 40 балық аулау ережелерін бұзу, 80 қаруды сақтау тәртібін бұзу, үшеуі қаруды заңсыз сатып алу мен сақтау және тоғызы басқа да құқық бұзушылықтар бойынша анықталды. Сонымен қатар екі миллион теңгеге жуық әкімшілік айыппұл салынды.

Хабар 24 телеарнасы