378,17 430.15 5.89
+7 (7172) 757 485 24kz@khabar.kz
ҚАЗ

Ақтауда жылу электр орталығындағы өрттен жұмысшы қаза тапты

  • 280
  • UPD: 16:53, 19.12.2018
Ақтауда жылу электр орталығындағы өрттен жұмысшы қаза тапты

Ақтаудағы «МАЭК-Қазатомөнеркәсіп» кәсіпорнында газ құрылғысынана өрт шығып, бір адам қаза тапты.

Номері екінші жылу электр орталығындағы газ құрылғысын жөндеу барысында газдың қысымымен от шығып, 35 жастағы жұмысшы сол жерде  күйіп қалған. Сол күйіктің салдарынан ол ауруханада 5 күннен кейін көз жұмды. Оқиғаның себеп-салдары анықталып жатыр. Қаза болған азамат осы мекемеде 12 жылдан бері жұмыс істейтін тәжірибелі маман болатын.

«Науқас 12 желтоқсанда облыстық ауруханаға жатқызылды. Оның денесінің 50 пайызын күйік шалған. Есеңгіреп қалған болатын. Оған алдын ала термиялық күйік диагнозы қойылды. Жансақтау бөлімінде қажетті медициналық көмек көрсетілгенімен өмірін сақтау мүмкін болмады», - дейді облыстық денсаулық сақтау басқармасының баспасөз хатшысы Азамат Сәрсенбаев.

Ал мекеме өкілі кімнің кінәлі екені анықталып жатыр дейді. «Оқиға, бір сөзбен айтқанда техникалық қауіпсіздіктің сақталмауынан болған. Бұл қателік кімнен кетті? Жұмысшының тарапынан ба, әлде соған жауапты азаматтардың тарапынан ба оны инспекция құрған комиссия анықтайды. Біз ол туралы ештеңе айта алмаймыз», - дейді «МАЭК-Қазатомөнеркәсіп» ЖШС бас директорының қоғаммен байланыс жөніндегі кеңесшісі Қолғанат Нұржаубайұлы.

Хабар 24 телеарнасы