419,54 511.30 5.71
+7 (7172) 757 485 24kz@khabar.kz
ҚАЗ

Елорда: жастарға жалға берілетін тұрғын үйге құжат қабылдау 1 желтоқсанда басталады

  • 143
  • UPD: 16:31, 30.11.2020
Елорда: жастарға жалға берілетін тұрғын үйге құжат қабылдау 1 желтоқсанда басталады Total.kz

Жұмыс істейтін жастарға сатып алу құқығынсыз жалға берілетін тұрғын үй үшін құжат қабылдау елордада 1 желтоқсанда басталып, 6 желтоқсанға дейін жалғасады.

Бұл туралы брифинг барысында Нұр-Сұлтан қалалық жастар саясаты мәселелері басқармасының басшысы Дәулет Кәрібек мәлімдеді, деп хабарлайды елорда әкімдігі.

«Биыл жұмыс істейтін жастарға 350 пәтер беру жоспарланып отыр. Бұл тұрғын үй бағдарламасының мақсаты – жастарды ынталандыру және бес жыл ішінде жеке үй сатып алуға қаражат жинауға жағдай жасау. Елорданың тұрғын үй қорына құжаттар желтоқсанның 1-інен 6-сына дейін қабылданады. Барлық жастарды осы бағытқа қатысуға шақырамыз», – деді елордалық жастар саясаты мәселелері басқармасының басшысы.

Жалға берілетін пәтерлер орналасқан үйлер Р.Қошқарбаев даңғылы мен Қордай даңғылының қиылысында, сондай-ақ Абылай хан мен Б.Момышұлы даңғылында орналасқан. Тұрғын үйдің ауданы 31-ден 47 шаршы метрге дейін. Ай сайынғы жалдау құны 5000-нан 15000 теңгеге дейін. Жалға алу мерзімі – бес жыл.

Бағдарламаға қатысу үшін оның шарттарын орындау қажет. Сонымен, соңғы екі жылда меншік құқығымен тұрғын үйі жоқ 29 жасқа дейінгі Қазақстан азаматтары жалға берілетін тұрғын үй алуға өтініш бере алады. Сонымен қатар ерлі-зайыптылар мен балалардың мүлкі болмауы керек. Соңғы екі жылда үзіліссіз тұрақты тұруға рұқсаты болуы қажет. Өтініш берушілердің ресми кірісі 40 АЕК немесе соңғы алты айда 111 120 теңгені құрауы керек.

«Егер өтініш берушілер төтенше жағдай режимінде Нұр-Сұлтанда 42 500 теңге алса және ол аяқталғаннан кейін қашықтан жұмыс түрінде болып, соның салдарынан кірісі төмендеген болса, бұл жағдай өтінішті қарау кезінде ескеріледі. Ол үшін сізге осы төлем түскен картаның шотынан үзінді-көшірме қосу керек», – деді Нұр-Сұлтан тұрғын үй қорының баспасөз хатшысы Арманай Оңғарбаева.

Іріктеу балдық жүйеге негізделеді. Ұпайлар отбасы, балалары, жеке кәсіпкерлері, мемлекеттік қызметте немесе бюджеттік ұйымда жұмыс істегені үшін беріледі. Жеке жетістіктер – мақтау қағаздары, марапаттары да ескеріледі.

Хабар 24 телеарнасы