383,43 430.12 5.96
+7 (7172) 757 485 24kz@khabar.kz
ҚАЗ


Қазақстанда жасалатын табиғи сусындар Сеулдегі халықаралық көрмеде таныстырылды

  • 121
  • UPD: 15:19, 10.06.2019
Қазақстанда жасалатын табиғи сусындар Сеулдегі халықаралық көрмеде таныстырылды

Корея тұрғындары қазақ сусындарын сүйсініп ішеді. Қазақстанда жасалатын табиғи таза сусындар Сеулде туризм саласына арналған халықаралық көрмеде таныстырылды, деп хабарлайды «Хабар 24».

Оған әлемнің 46 елінен бірнеше туристік компания қатысты. Арасында қазақстандық туроператорлар да бар.

Халықаралық көрме. 46 мемлекеттің өкілдеріне өз елін жарнамалауға бірегей мүмкіндік. Бұл ретте қазақстандық мамандардың шоқтығы биік. Өйткені келушілердің қарасы ұзын-сонар кезекке ұласты. Барлығын қазақы сусын шалаптың дәмі мен дайындалу тәсілі қызықтырады.

Әлібек Жайбергенов, бармен:

Біз оны қышқыл айраннан жасаймыз. Міндетті түрде құрт пен су және аздап тұз қосамыз. Әдетте бір-екі күн тұрғаннан кейін табиғи газ өздігінен түзіледі. Алайда бұл жерде ондай уақыт болмағандықтан газдалған су қосып жатырмыз.

Бүгінде кореялықтар дұрыс тамақтануға баса мән бере бастаған. Сондықтан қазақ асханасына қызығушылар көп. Өйткені құрт, талқан, бал, алма - барлығы табиғи таза өнім. Кез келгені дәмнен ауыз тиіп, елдің тарихы һәм табиғатымен танысады. Былтырғы көрмеде Қазақстанның тіл үйірер тағамына 35 мың кореялық тәнті болса керек-ті.

Қайрат Сәдуақасов, «Kazakh Tourism» ҰК басқарма төрағасының орынбасары:

- Нұр-Сұлтан, Алматы қалалары мен Алматы облысына туристердің қызығушылығы жоғары. Визасыз режим болғандықтан, сенбі, жексенбі күндері Қазақстанға келіп демалып кететін туристердің саны артып жатыр. Көбіне корейлер гольф ойнап, Шымбұлақта шаңғы тепкенді және түнгі Алматыда серуендегенді ұнатады.

Ким Сан Би, көрме қонағы:

- Оңтүстік Корея мен Солтүстік Корея арасындағы теміржол қатынасы ашылса жақсы болар еді. Сонда Қазақстанға бару жолымыз жеңілдер еді.

«Kazakh Tourism» ұлттық компаниясының мәлімдеуінше, соңғы уақытта Малайзия, Біріккен араб әмірлігі, Гонконг және Қытай елінің азаматтары Қазақстанға қыдыруды үдете бастаған. Ал Еуропа елдерінің ішінде Германия мен Ресей тұрғындары біздің елге қонақ болғанды құп көреді. Ондай үрдіске туристік компаниялардың өзара ынтымақтаса жұмыс істеуі түрткі болған.

Авторлары: Талғатбек Әбдіқожа, Владислав Цой, Ольга Лян Хабар

Хабар 24 телеарнасы