419,66 501.30 5.64
+7 (7172) 757 485 24kz@khabar.kz
ҚАЗ

Сенат төрағасы қазақстандық еріктілерді Халықаралық волонтерлер күнімен құттықтады

  • 226
  • UPD: 15:16, 05.12.2020
Сенат төрағасы қазақстандық еріктілерді Халықаралық волонтерлер күнімен құттықтады фото: inform.kz

Сенат төрағасы Мәулен Әшімбаев барлық қазақстандық еріктілерді Халықаралық волонтёрлер күнімен құттықтады.

«Бүгін әлем бойынша Халықаралық волонтерлер күні аталып өтуде. Осыған орай еліміздегі барлық волонтерді атаулы күнмен құттықтаймын!

Көптеген дамыған елдерде волонтерлердің қоғамдағы рөлі ерекше. Соңғы кездері Қазақстанда да бұл үрдістің аясы кеңейіп, қарқынды дамып келе жатқаны қуантады. Оған Мемлекет басшысының 2020 жылды «Волонтер жылы» деп жариялауы да тың серпін бергені анық.

Соның нәтижесінде көптеген игілікті істер мен нақты жобалар қолға алынды. Жастарымызбен бірге егде жастағы азаматтардың да белсенділігі арта бастады. Әсіресе, пандемиямен күрес кезінде волонтерлердің ел үшін атқарған ерен еңбегін айрықша атап өткен жөн. Бұл – патриотизмнің, қайырымдылықтың және қамқорлықтың жарқын көрінісі.

Жалпы ерікті болу қазаққа жат дүние емес. Асар сияқты көптеген салт-дәстүріміз осы бастамамен үндес екенін бәріміз жақсы білеміз. Сондықтан алдағы уақытта Қазақстанда волонтерліктің маңызы артып, елімізде еріктілердің қатары көбейеді деп сенемін.

Волонтер күні құтты болсын!», - деп жазды М.Әшімбаев Facebook-тегі парақшасында.

Хабар 24 телеарнасы